Արմինֆո. ՀՀ կառավարությունն այսօր կայացած նիստում ընդունել է համապատասխան որոշումներ, որոնցով առաջարկվում է արգելել աջակողմյան ղեկային տեղաբաշխմամբ տրանսպորտային միջոցների ներմուծումը:
Որոշումներով սահմանվում է նաև ՀՀ մինչև 2018 թ. ապրիլի 1-ը ներմուծված աջակողմյան ղեկային տեղաբաշխմամբ տրանսպորտային միջոցների սեփականատերերի սեփականության տնօրինման իրավունքը: Գործող սեփականատերերը, ըստ որոշման, կարող են ազատ շահագործել, հաշվառել և վերահաշվառել իրենց տրանսպորտային միջոցները: Ըստ հիմնավորման՝ ՀՀ-ում աջակողմյան ղեկային տեղաբաշխմամբ տրանսպորտային միջոցների շահագործումը երթևեկության համար վտանգ է ներկայացնում, քանի որ աջակողմյան երթևեկության դեպքում տրանսպորտային միջոցի վարորդն ունի սահմանափակ տեսանելիություն: ՀՀ տրանսպորտի, կապի և տեղեկատվական տեխնոլոգիաների նախարար Վահան Մարտիրոսյանը նշել է, որ ըստ ոստիկանության և ապահովագրական ընկերությունների տվյալների, աջակողմյան մեքենաների մասնակցությամբ վթարների քանակն 28 տոկոսով ավելի է, քան ձախակողմյանը, իսկ վիրավորների քանակն ավելի է 39 տոկոսով: Նախարարը նշել է, որ նշված սահմանափակումը չի տարածվելու մինչև ապրիլի 1-ը ներմուծված և հաշվառված ավտոմեքենաների վրա: Փոխվարչապետ Վաչե Գաբրիելյանը հանձնարարել է պատրաստել համապատասխան օրենքի նախագիծ, հաջորդ շաբաթ ներկայացնել կառավարություն, որպեսզի այն անհետաձգելի կարգով ներկայացվի Ազգային ժողով:
Մինչդեռ ավելի վաղ ԱրմԻնֆո-ի հարցմանն ի պատասխան՝ ՀՀ ճանապարհային ոստիկանությունում հայտնել են, որ աջակողմյան մեքենաների մասնակցությամբ ՃՏՊ-ների վիճակագրություն ընդհանրապես չկա: ՃՈ-ում հայտնել են նաև, որ վիճակագրություն սկսել է իրականացվել միայն 2017 թ. կեսից, և առայժմ այս առնչությամբ ընդհանրացված տվյալներ չկան:
Չնայած այն բանին, որ նախարարը, որպես ընդունված որոշման հիմնավորում, մատնանշել է բացառապես ՃՏԵ անվտանգության ապահովման անհրաժեշտությունը՝ այնուամենայնիվ, արգելքն, ամենայն հավանականությամբ, պայմանավորված է Եվրասիական տնտեսական միության կանոններով, որի անդամ է Հայաստանը:
RUB | 4.18 | -0.02 |
USD | 390.04 | -1.40 |
EUR | 415.63 | -1.21 |
GBP | 481.74 | -0.75 |
CAD | 284.60 | -0.69 |
JPY | 25.20 | -0.09 |
CNY | 53.82 | -0.22 |
CHF | 427.68 | -1.72 |