Երկուշաբթի, 16 Հունվարի 2017 18:23

Արմինֆո. Վարչապետ Կարեն Կարապետյանի գլխավորությամբ կառավարությունում տեղի է ունեցել տեղեկատվական և հեռահաղորդակցության տեխնոլոգիաների (ՏՀՏ) բնագավառի զարգացման վերաբերյալ հերթական քննարկումը:

Ինչպես ԱրմԻնֆո գործակալությանը տեղեկացվել է ՀՀ կառավարության մամուլի ծառայությունից, կառավարության ղեկավարին է ներկայացվել մինչև 2025 թվականը շուկայի պահանջներին բավարարող ՏՀՏ ոլորտի բարձրակարգ մասնագետների պատրաստման, բուհերի կարողությունների զարգացման, այդ թվում՝ անհրաժեշտ տեխնոլոգիական սարքավորումներով հագեցվածության ապահովման, ՏՀՏ ոլորտի ընկերությունների խթանման առարկայական նախագծերի փաթեթ: Այն մշակվել է շահագրգիռ գերատեսչությունների և ոլորտի ներկայացուցիչների համատեղ աշխատանքային խմբի գործունեության արդյունքում: Փաթեթը նախատեսում է մասնագիտական կրթական համակարգի բարեփոխումներ և ՏՀՏ ոլորտի աշխատուժի զարգացմանը վերաբերող կոնկրետ նախագծեր՝ պետություն-մասնավոր համագործակցությամբ: Փաթեթով նախատեսվող միջոցառումների արդյունքում ակնկալվում է մինչ 2025 թ.-ը ՀՀ-ում ստեղծել 40 հազար ինժեներական աշխատատեղ, հայաստանյան ՏՀՏ ոլորտ ներգրավել ոչ միայն սփյուռքահայ, այլ նաև արտերկրի բարձրակարգ մասնագետների:  

Վարչապետը ողջունել է ներկայացված ծրագրային փաթեթի մշակումը և  կարևորել պետական գերատեսչությունների, ՏՀՏ ոլորտի ընկերությունների և կրթական կենտրոնների միջև ակտիվ ու շարունակական համագործակցությունը: Կարեն Կարապետյանն ընդգծել է, որ կառավարությունը պատրաստ է անհրաժեշտ քայլեր իրականացնել՝ բարձրակարգ մասնագետների պատրաստման, ոլորտի խթանման նպատակով: Գործադիրի ղեկավարը հորդորել է ՏՀՏ բնագավառի ներկայացուցիչներին ներկայացնել նաև  գործարար միջավայրի բարելավմանն ուղղված առաջարկներ: Վարչապետը պատրաստակամություն է հայտնել քննարկել բիզնեսի խթանմանն առնչվող բոլոր հարցերը և առաջարկել ձևակերպել, թե որ օրենքի, կառավարության որ որոշման փոփոխությունը կարող է նպաստել ՏՀՏ ծրագրերի իրականացմանը:

Նշենք, որ 2015 թվականի տվյալներով Հայաստանի ՏՏ ոլորտում գործում էր մոտ 500 ընկերություն: Տեղեկատվական տեխնոլոգիաների ոլորտն ապահովում 20-25% տարեկան աճ: ՏՏ ոլորտի մասնաբաժինը Հայաստանի ՀՆԱ-ի կառուցվածքում կազմում է 3.8%: Ըստ ոլորտի զարգացման ռազմավարության մինչև 2018 թվականը ՏՏ ոլորտում նախատեսվում է ապահովել 1 մլրդ.դոլարի շրջանառություն: Հայաստանի կապի ոլորտի հասույթը 2016 թվականի հունվար-նոյեմբերին կազմել է 139.1 մլրդ.դրամ, տարեկան կտրվածքով նվազելով 8.7% (նախորդ տարվա անկումը` 6.2%): Ըստ ՀՀ Ազգային վիճակագրական ծառայության տվյալների, կապի ոլորտում գերիշխող հեռահաղորդակցոթյան ոլորտը (95%) ապահովում է տարեկան 131.7 մլրդ դրամի հասույթ, տարեկան կտրվածքով կրճատվելով 8,7% (նախորդ տարվա անկումը` 6,6%): Ըստ վիճակագրության, միայն 2016-ի նոյեմբերին կապի ոլորտի ընդհանուր հասույթը նվազել է 1.5%, մինչև 12,2 մլրդ դրամ: Ընդ որում, հեռահաղորդակցության հատվածն ապահովել է 11,4 մլրդ դրամի հասույթ, կրճատվելով հաշվետու ամսվա ընթացքում`1.8%: Տարեկան կտրվածքով կապի ոլորտի հասույթը կրճատվել է 7,6%, ընդ որում, հեռահաղորդակցության հատվածում արձանագրվել է 8%: Համեմատության համար նշենք, որ 2015 թվականի հունվար-նոյեմբերին Հայաստանի կապի ոլորտի հասույթը կազմել էր 153.7 մլրդ դրամ, այդ թվում, հեռահաղորդակցության հատվածում այն կազմել էր 145,6 մլրդ դրամ: