Հինգշաբթի, 22 Հունիսի 2017 13:06

Արմինֆո. Հայաստան-Վրաստան էլեկտրահաղորդման գծի կառուցման կապալառու կազմակերպության ընտրության միջազգային մրցույթը կավարտվի 2017 թվականի սեպտեմբերին: Այս մասին ԱրմԻնֆո գործակալությանը տեղեկացվել է ՀՀ էներգետիկ ենթակառուցվածքների և բնական պաշարների նմախարարության մամուլի ծառայությունից:

Նախարարությունը հաղորդել է, որ Իրան-Հայաստան և Հայաստան-Վրաստան էլեկտրահաղորդման օդային գծերի կառուցումից և շահագործման հանձնելուց հետո Հայաստանը հանդես կգա  էլեկտրաէներգետիկ ոլորտի տարածաշրջանային հաբի (հանգույցի) դերում՝ կապելով Իրանի, Վրաստանի և Ռուսաստանի էլեկտրաէներգետիկական համակարգերը։

Կառավարության գործունեության առաջիկա հինգ տարիների ծրագիրն ամրագրել է, որ ինչպես Իրան-Հայաստան, այնպես էլ Հայաստան-Վրաստան օդային գծերը շահագործման կանձնվեն  2019թ. վերջին։

Իրան-Հայաստան 400կՎ էլեկտրահաղորդման գծի կառուցման ծրագրի շրջանակներում, որն արդեն մեկնարկել է, 2017-2018թթ. ընթացքում նախատեսվում է ավարտել հենասյունների և հաղորդալարերի մոնտաժման, ինչպես նաև ենթակայանի կառուցման աշխատանքները։ Գիծը և ենթակայանը շահագործման կհանձնվեն 2019թ.։ Այն հնարավորություն կընձեռի 3 անգամ ավելացնել էլեկտրաէներգիայի փոխհոսքերը հարևան Իրանի հետ։

Մինչև տարեվերջ կառավարությունը մտադիր է սկսել նաև Հայաստան-Վրաստան 400կՎ օդային գծի նախագծման աշխատանքները։ Ծրագրի իրականացման ավարտ է սահմանված 2019 թվականը։

Ըստ ԱրմԻնֆո գործակալության տվյալների, Հայաստան-Վրաստան էլեկտրահաղորդման գծերը միավորում են Հայաստանի և Վրաստանի էներգետիկ համակարգը, հանդիսանալով «Հյուսիս-Հարավ» էներգետիկ միջանցքի մաս: Դրան զուգահեռ շարունակվում է Իրան-Հայաստան էլեկտրահաղորդման գծի շինարարությունը: Ներդրումների ընդհանուր ծավալը երկու նախագծերում կկազմի մոտ 420 մլն.դոլար: Ծրագրի իրականացման արդյունքում կամրապնդվեն միջտարածաշրջանային կապերը, կբարձրանա փոխադարձ առևտրի և էլեկտրաէներգիայի առևտրի ծավալը:

Հիշեցնենք, որ հունիսի 19-ին ՀՀ կառավարությունը հաստատեց իր գործունեության 2017-2022 թվականների ծրագիրը, ըստ որի, ՀՀ կառավարության քաղաքականությունն այդ տարիներին ուղղված կլինի երկրի էներգետիկ անկախության և անվտանգության, տարածաշրջանային ինտեգրման ապահովմանը և երկրի էներգետիկ ռեսուրսների լիակատար օգտագործմանը, ինչպես նաև ժամանակակից էներգաարդյունավետ տեխնոլոգիաների ներդրմանը: Բացի այդ, որ մինչև 2020 թվականի ավարտը նախատեսվում է մշակել «Էներգետիկայի մասին» նոր օրենքը, հաշվի առնելով միջազգային լավագույն փորձը, իսկ մինչև 2021 թվականի ավարտը`առաջարկել Հայաստանի էլեկտրաէներգետիկ համակարգի հետագա 10 տարիների զարգացման հեռանկարային նոր ծրագիրը: