Չորեքշաբթի, 30 Նոյեմբերի 2022 16:59

Արմինֆո.Էկոնոմիկայի նախարարությունը "թթվածնով" կապահովի այն ՏՏ ընկերություններին, որոնք աշխատում են միջազգային շուկայի հետ։ Այդ մասին հայտարարել է ՀՀ էկոնոմիկայի նախարար Վահան Քերոբյանը Հայաստանում ներդրումային խորհրդի (Investment Council of Armenia-ICA) գործունեության 15 - ամյակին նվիրված միջոցառման շրջանակներում՝ պատասխանելով ԱրմԻնֆո-ի թղթակցի հարցին։

 

Նա նշել է, որ դրամի ամրապնդման պատճառով խիստ տուժել են ՏՏ ընկերությունները, որոնց եկամտի կառուցվածքում զգալի մասը  բաժին է ընկնում արտահանմանը։ "Մենք առաջարկել ենք ընկերություններին թթվածին տալ, որպեսզի նրանք ժամանակ ունենան վերակառուցվելու", - ասել է նախարարը:

 

Քերոբյանը պարզաբանել է, որ աջակցությունը տրամադրվելու է սուբսիդիաների տեսքով։ "Մեր առաջարկը հետևյալն է. ընկերություններին վերադարձնել վճարված եկամտահարկը՝ սեպտեմբերից դեկտեմբեր ընկած ժամանակահատվածում։ Մենք անում ենք հնարավոր ամեն ինչ, որպեսզի մինչեւ շաբաթվա վերջ այդ որոշումը կայացվի", - ընդգծել է գերատեսչության ղեկավարը։

 

Այդ կապակցությամբ նա հիշեցրել է, որ Հայաստանի "2050" ռազմավարության 18 նպատակներից 5 կետ վերաբերում է ՏՏ ոլորտին։ "Սա մեզ համար ռազմավարական ուղղություն է, եւ մենք պետք է օգնենք, որպեսզի ստեղծված միջավայրը օգտակար լինի ՏՏ-ի համար, այլ ոչ թե աշխատի նրանց դեմ", - եզրափակել է նա:

 

Նշենք, որ մեկ օր առաջ էկոնոմիկայի նախարար Վահան Քերոբյանը Հանրային հեռուստատեսությամբ հեռարձակված հարցազրույցում հայտարարել էր Հայաստանում գործող ՏՏ ընկերությունների համար դրամի ամրապնդմանն առնչվող դժվարությունների հաղթահարմանն ուղղված ծրագրի մասին:

 

Հիշեցնենք, որ 2022թ. մարտից արտարժույթի շուկայում դիտվող բարձր անկայունությունը պայմանավորված էր ռուս-ուկրաինական ռազմաքաղաքական հակամարտության ֆոնին Ռուսաստանի նկատմամբ ԱՄՆ - ի և Եվրոպայի համալիր, աննախադեպ, մասշտաբային պատժամիջոցներով ։ Այդ նույն ժամանակաշրջանից նկատվում է ՌԴ մեծ թվով քաղաքացիների ներհոսք Հայաստան, որոնք ժամանելուն պես տեղափոխում էին նաև իրենց կապիտալները, ինչն էլ, իր հերթին, զգալիորեն ավելացրել է Ռուսաստանից ստացվող փոխանցումների ծավալը, և դա դոլարային զանգվածի ավելացման հետ մեկտեղ դարձել է Հայաստանի արժութային շուկայում դոլարի արժեզրկման գլխավոր պատճառներից մեկը։ Դրան գումարած՝ Հայաստանի քաղաքացիները սկսել են հապճեպ կերպով փոխանակել իրենց ունեցած դոլարները՝ դրանով իսկ էլ ավելի արժեզրկելով դրանք։ Ավելի ուշ՝ սեպտեմբերի վերջին տասնօրյակում, ՌԴ-ում զորահավաքի հայտարարումից հետո, Հայաստան է լցվել ռելոկանտների նոր հոսք։ Արդյունքում՝ Հայաստանի մանրածախ արժութային շուկայում փետրվարի 23-ից մինչեւ մարտի 10-ը դրամը դոլարի նկատմամբ թուլացել է 10% - ով, միջին հաշվով, մինչև 522 դր/$1, այնուհետև սկսել է արագ ամրապնդվել ՝ մինչև սեպտեմբերի 12-ը ներառյալ ընդհանուր առմամբ 22% - ով ՝ մինչև 410 դր / $1 ։ Բայց սեպտեմբերի 13 - ից սկսած ՝ ռազմաքաղաքական գործոնի ազդեցության տակ (ժամը 00:05-ին ադրբեջանական զինուժը անօդաչու թռչող սարքերի կիրառմամբ հրետանուց և խոշոր տրամաչափի զենքերից սկսեց ինտենսիվ գնդակոծել հայկական դիրքերը Գեղարքունիքի, Վայոց Ձորի և Սյունիքի մարզերի ուղղությամբ, բայց սեպտեմբերի 14-ի երեկոյան կրակի դադարեցման պայմանավորվածություն ձեռք բերվեց), դրամը կրկին սկսեց թուլանալ դոլարի նկատմամբ ՝ սեպտեմբերի 20-ին հասնելով 425 դր / $1-ի։ Սակայն հետո մանրածախ արժութային շուկայում վերսկսվեց դրամի արժեւորման  տրամադրությունն՝ ընդհուպ մինչեւ սեպտեմբերի 29-ը ներառյալ ՝ վերադարձնելով այն նախկին 410 դր/$1-ին։ Սակայն մոբիլիզացիայի հայտարարման պատճառով ՌԴ-ից դուրս եկող ռելոկանտների նոր ներհոսքը Հայաստան կրկին վերսկսեց դրամի արժեզրկումը ԱՄՆ դոլարի նկատմամբ մինչև 413 դր/$1՝ սեպտեմբերի 30-ի դրությամբ։ Դա երկար չտեւեց, քանի որ հոկտեմբերի սկզբին դրամը կրկին սկսեց արժեւորվել՝ հոկտեմբերի 7-ին վերադառնալով սեպտեմբերի 12-ին արձանագրված 410 դր/$1-ին՝ այդ մակարդակում մնալով մինչեւ հոկտեմբերի 15-ը, որից հետո արժեւորումը շարունակվեց մինչեւ հոկտեմբերի 28-ը՝ մինչեւ 400 դր/$1։ Այս մակարդակում դրամը պահպանվել է մինչեւ նոյեմբերի առաջին տասնօրյակի վերջը, բայց հետո ամրապնդումը շարունակվել է մինչեւ նոյեմբերի 21-ը՝ մինչեւ 398 դր/$1։

 

Ընդհանուր առմամբ, այս տարվա փետրվարի 24-ից մինչեւ մարտի 10-ն ընկած ժամանակահատվածում դրամն ԱՄՆ դոլարի նկատմամբ թուլացել է 10% - ով, որից հետո նկատվել է արժևորում, որի արդյունքում դրամն արժևորվել է 23% - ով, իսկ դիտարկվող այս ողջ ժամանակահատվածում (ս.թ. փետրվարի 24-ից մինչեւ նոյեմբերի 21-ը) դրամն ԱՄՆ դոլարի նկատմամբ արժևորվել է 18% - ով։