Երկուշաբթի, 3 Ապրիլի 2023 17:48

Արմինֆո. Հայաստանում 2023 թվականի ապրիլից ԱՊՊԱ-ն (ավտոքաղաքացիական պատասխանատվության պարտադիր ապահովագրություն) սկսում է ազատ նավարկությունը։ Խոսքը "ավտոքաղաքացիության" սակագների ազատականացման մասին է։

Սա նշանակում է, որ, ի տարբերություն նախկինում գործող ռեժիմի, երբ ապահովագրական ընկերությունները միասնական/հավասարեցված գնի պայմաններում կարող էին մրցակցել, հիմնականում, հաճախորդների սպասարկման որակի, հատուցումների և միջնորդավճարների չափերի առումով, ապա այսուհետեւ, ապրիլի 1-ից սկսած, հիմնական մրցակցային պայման է դառնում ԱՊՊԱ-ի գինը:

 

Ինչպես ԱրմԻնֆո-ի թղթակցի հետ զրույցում հայտարարել է "Արմենիա Ինշուրանս" ապահովագրական ընկերության գլխավոր տնօրեն Արման Դաղունցը, ԱՊՊԱ ազատականացման շրջանակներում գների ձևավորման մոդելներում առանցքային դերը, միանշանակ, հատկացվում է ակտուարական հաշվարկներին: "Միևնույն ժամանակ, որքան էլ դրանք ճշգրիտ լինեն և հաշվի առնեն գների վրա ազդող հավանական կարևոր գործոնները, առաջիկա մեկ տարվա ընթացքում գները որոշ չափով կսրբագրվեն, քանի որ խոսել բացարձակ ճիշտ հաշվարկների մասին՝ իրատեսական չէ։ Բացի այդ, շուկայում մրցակցությունը կհանգեցնի նաեւ որոշակի ճշգրտումների եւ արդյունավետ գնագոյացման", - կարծում է Դաղունցը։ Ընդ որում, նա միանշանակ նշել է, որ ԱՊՊԱ սակագների ազատականացման շրջանակներում որոշ ավտոմեքենաների սեփականատերերի համար գները կնվազեն, մյուսների համար՝ կբարձրանան, քանի որ յուրաքանչյուրը պետք է վճարի ռիսկայնության մակարդակին (վթարայնության աստիճանին) համապատասխան։

 

Որպես օրինակ՝ Դաղունցը ներկայացրել է "Արմենիա ինշուրանս" ԱԸ-ում հնարավոր գնային փոփոխությունները։ "Մեր ուսումնասիրությունները ցույց են տվել, որ 2022 թվականի համանման պորտֆելի ձևավորման դեպքում առցանց ռեժիմով պայմանագրեր կնքող հաճախորդների շրջանում 55%-ի մոտ կհետևի գների իջեցում, 10% - ի մոտ՝ կմնան անփոփոխ, 35% - ի մոտ՝ կբարձրանան։ Իսկ գործակալական ցանցի միջոցով կնքվող պայմանագրերով այդ բաժնեմասերը միջինում կկազմեն, համապատասխանաբար, 42%, 12% և 46%", - հստակեցրել է Դաղունցը։

 

ԱՊՊԱ էլեկտրոնային ապահովագրերի վաճառքի ակտիվության անկումը, ինչի մասին վկայում է դրանց աճի կտրուկ դանդաղումը՝ 2021թ. 73,4% - ից մինչև  22,2%՝  2022թ., նրա ենթադրությամբ, կարող է պայմանավորված լինել առցանց ծառայություններից օգտվող քաղաքացիների սահմանափակ թվով։ Սակայն, ապրիլի 1-ից, ազատականացումից հետո ապահովագրական ընկերություններն իրենց սակագնային քաղաքականության մեջ կսկսեն նախապատվությունը տալ ապահովագրերի էլեկտրոնային վաճառքին, որոնք "Արմենիա Ինշուրանս" ընկերությունում հնարավոր կլինի ձեռք բերել 15%-ով ցածր գնով։ Ուստի, օրինակ, այս ընկերության դեպքում կարելի է ենթադրել, որ նման պայմանագրերի քանակի ավելացումը զգալիորեն կարագանա։