Չորեքշաբթի, 5 Ապրիլի 2023 17:13

Արմինֆո.Փոխվարչապետ Մհեր Գրիգորյանը ներկա է գտնվել «Բացահայտելով թվային ապագան» խորագրով Doing Digital ֆորումի բացման արարողությանը:

Կառավարության հաղորդագրության համաձայն, փոխվարչապետը հանդես է եկել ողջույնի խոսքով, որում, մասնավորապես, նշել է.

 

«Հարգելի գործընկերներ, հարգելի հյուրեր, տիկնայք և պարոնայք, Ուրախ եմ տեսնել «Doing Digital» միազգային ֆորումի անցկացումը Հայաստանում նման հագեցած օրակարգով, թվային ու տեխնոլոգիական ոլորտը ներկայացնող ականավոր հյուրերի ու խոսնակների մասնակցությամբ։

 

Վերջին տարիներին մեր երկրում տեխնոլոգիական խորագրով անցկացվող միջազգային միջոցառումների ինտենսիվացումն ինքնին այն բանի տեսանելի ցուցիչ է, որ Հայաստանի տնտեսական ու հանրային կյանքում թվային փոխակերպումը գերակայող օրակարգ է դարձել։

 

Ինչ խոսք, ուրախալի փաստ է նաև այն, որ նման հարթակներն առաջնորդվում են մասնավոր հատվածի ու մասնագիտական համայնքի կողմից: Թվային ապագան պետք է իրականություն դառնա հենց քաղաքացիների ու մասնավոր հատվածի էական դերակատարմամբ, և պետությունը հնարավոր ջանքեր է գործադրելու բաց և հասանելի տվյալների քաղաքականություն ներդնելու, կրիտիկական ենթակառուցվածքներ, խաղի կանոններ և նպաստավոր ու անվտանգ միջավայր ձևավորելու գործում։ Սա է Կառավարության հիմնարար մոտեցումը թվային բարեփոխումների իրականացման գործում:

 

Պատահական չէ, որ թվայնացման օրակարգի հայեցակարգային մակարդակում շեշտադրել ենք անցումը էլեկտրոնային կառավարությունից դեպի թվային հասարակության: Սա նշանակում է, որ քաղաքացին և մասնավոր հատվածը գտնվում են թվային փոխակերպման կենտրոնում, և լուծումները քննարկվում են նրանց տեսանկյունից:

 

Այս օրակարգը կյանքի կոչելու նպատակով Տեղեկատվական համակարգերի կառավարման խորհուրդը, որը ձևավորվել է 2022 թվականի սկզբին, և որը պատիվ ունեմ նախագահելու՝ որպես երկրի Գլխավոր տեղեկատվական համակարգող, հաստատել և Ձեր դատին է ներկայացրել թվային հասարակության ու տնտեսության տեսլականն ու 9 գլխավոր թիրախները:

 

Տեսլականը կառուցված է «Բաց և որակյալ տվյալները ազգային հարստության համար կենսական նշանակություն ունեցող ակտիվ են» ուղերձի շուրջ, իսկ թիրախները շեշտադրում են հետևյալ սկզբունքները՝

- բոլոր քաղաքացիները հասանելիություն են ունենալու թվային նույնականացման լուծումներին, և դրա համար ուղղակիորեն չեն վճարելու,

- քաղաքացիները և տնտեսավարողները պետական համակարգին տվյալները տրամադրելու են «միայն մեկ անգամ» սկզբունքով,

- պետության կողմից մատուցվող ծառայությունները նախագծվելու են կյանքի իրավիճակների շուրջ:

Մեր համոզմամբ՝ թվայնացման ոլորտում ներդրումները հանգեցնելու են հասարակության, տնտեսության և կառավարության փոխակերպմանը, ներառյալ՝ հարմարավետությանն ու արտադրողականությանը խոչընդոտող ինստիտուտների, գործառույթների ու գործընթացների վերափոխմանը կամ վերացմանը:

 

Թույլ տվեք, այսպիսով, ամփոփել խոսքս մի պարզ ուղերձով, որին անվերապահ հավատում եմ։ Թվային տնտեսության դարաշրջանում հասարակության առաջընթացի գրավականը առաջին հերթին վստահության միջավայրը, միտքն ու նորարարությունն են, ինչի ներուժը Հայաստանը վստահաբար ունի: Լիահույս եմ, որ մասնավոր հատվածի կողմից թվայնացման օրակարգի առաջնորդումը և պետության կողմից թվային հասարակության և տնտեսության զարգացման մեջ ողջամիտ ներդրումները թույլ կտան այդ ներուժի իրացումը հասցնել առավելագույնի», - ընդգծել է փոխվարչապետը՝ բարի ընթացք և արգասաբեր աշխատանք մաղթելով ֆորումին։ 

 

Հիշեցնենք, որ ապրիլի 5-ին Երևանում մեկնարկել է The Doing Digital Forum (https://doingdigital.am /), որը մեկտեղել է թվային փոխակերպման ոլորտի ավելի քան 20 առաջատար միջազգային և հայաստանյան փորձագետների: Ֆորումի կազմակերպիչն է SPRING PR-ը, համակազմակերպիչը՝ Ամերիաբանկը: Ֆորումի գլխավոր բանախոսը թվային տրանսֆորմացիայի և ֆինանսական տեխնոլոգիաների միջազգային հայտնի փորձագետ Քրիս Սքիներն է:

 

Միջոցառումը նպատակ ունի մեկ հարթակում հավաքել ոլորտի առաջատարներին ՝ թվային փոխակերպման վերջին միտումները բացահայտելու և լավագույն փորձը կիսելու համար: DDF-ը ձգտում է դառնալ լավագույն հարթակ նոր գաղափարների և տեխնոլոգիաների բացահայտման, մասնագիտական կապերի ձևավորման համար: Համաժողովի շրջանակներում ելույթ կունենան և բիզնեսի և թվային տեխնոլոգիաների ոլորտի գիտելիքները, տեսլականը կներկայացնեն նաև Արմեն Հարությունյանը (Սինգապուրի սոցիալական գիտությունների համալսարան), Դևիդ Կինչեմը (McKinsey), Ելենա Թոֆանյուկը (Forbes Russia), Դիլան Կալունը (Visa), Ներսես Երիցյանը ("Հայաստանի տեղեկատվական համակարգերի գործակալություն" հիմնադրամ): DDF ձեւաչափի բանախոսների թվում են նաեւ Ռուբեն Մուրադյանը (Hexens),  Վախթանգ Աբրահամյանը (Fastex), Վաչիկ Գեւորգյանը (Apricot Capital), Տիգրան Սիմոնյանը (Revytech), Արարատ Մկրտչյանը (Beta Financial Technologies), Մաքսիմ Միխալեւը (ICDT Global), Սյուզաննա Շամախյանը (FAST), ինչպես նաեւ ՀՀ կառավարության եւ Կենտրոնական բանկի ներկայացուցիչներ: Թվային փոխակերպման ոլորտում իրենց փորձը կկիսեն Ամերիաբանկի նորարարության և թվայնացման գծով տնօրեն Արտյոմ Շամցյանը և ֆինանսական գծով տնօրեն Հովհաննես Թորոսյանը: